Baadhi ya magazeti nchini Zambia yameripoti kuwa klabu ya ZESCO United itamsajili kiungo wa Yanga Papi Tshishimbi mwishoni mwa msimu.

ZESCO inanolewa na kocha wa zamani wa Yanga, George Lwandamina aliyejiunga na timu hiyo mwishoni mwa msimu uliopita.

Mkataba wa Tshishimbi wa kuitumikia Yanga unamalizika mwishoni mwa msimu huu kama Yanga itashindwa kumshawishi asaini mkataba mpya basi huenda akaenda kujiunga na timu hiyo akiwa mchezaji huru.

Alipotua Yanga msimu uliopita akitokea Mbabane Swallows, Tshishimbi alionyesha kiwango cha hali ya juu.

Hata hivyo msimu huu bado haujawa mzuri sana kwake kutokana na kukabiliwa na majeruhi ya mara kwa mara. Ameshindwa kufikia makali yake ya msimu uliopita

Katibu wa Baraza la Wazee la Yanga Ibrahim Akilimali amepinga kurejea kwa Mwenyekiti wa klabu hiyo Yusufu Manji na ameitilia shaka barua inayodaiwa kuwa ameiandika kuridhia kurejea katika nafasi yake.

Akizungumza na waandishi wa habari leo, Akilimali ambaye tayari amechukua fomu ya kugombea nafasi ya Uwenyekiti ameitaka Taasisi ya Kuzuia na Kupambana na Rushwa (TAKUKURU) iichunguze barua hiyo iliyosomwa na Mwenyekiti wa Baraza la Wadhamini Kapteni George Mkuchika.

Aidha Akilimali amedai kushangazwa na viongozi wa Yanga kuendelea kumsemea Manji wakati yeye mwenyewe yupo.

Akilimali amemtaka Manji ajitokeze hadharani kuwaambia WanaYanga kama amerejea au la na sio kusemewa na watu wengine kila siku.

Katika hatua nyingine, Mwenyekiti kamati ya Uchaguzi ya TFF Malange Mchungahela amewataka viongozi wa Baraza la Wadhamini Yanga pamoja na wajumbe Kamati ya Utendaji wajieleze kwanini wasichukuliwe hatua kutokana na kutaka kuvuruga mchakato wa Uchaguzi wa klabu hiyo.

Mchungahela amesisitiza kuwa zoezi la utolewaji wa fomu kwa ajili ya nafasi zote za uchaguzi zilizotangazwa (ikiwemo ya Mwenyekiti) linaendekea na litafikia tamati 14/11/2018.

Amesema wale wanaomtaka Manji arejee Yanga basi ni vyema wakaenda kumchukulia fomu

Mwenyekiti wa Baraza la Wadhamini wa Yanga Kapteni George Mkuchika amesema Yussuf Manji amerejea katika nafasi yake baada ya kumuandikia burua ya kukubali ombi la Wanachama wa klabu hiyo kumtaka atengue uamuzi wake wa kujiuzulu

Akizungumza na waandishi wa habari leo baada ya kikao kilichoitishwa na Baraza hilo, Kapteni Mkuchika ameonyesha barua iliyoandikwa na Manji kuridhia kurejea katika nafasi ya Uwenyekiti wa Yanga.

Kapteni Mkuchika amesema Manji aliandika barua ya kujiuzulu lakini wanachama walilikataa ombi lake kupitia Mkutano halali wa klabu hiyo na kumuomba arejee katika nafasi yake.

Barua hiyo aliyoandika ni uthibitisho kuwa ameridhia maombi ya wanachama wa Yanga na sasa ni rasmi amerejea katika nafasi yake.

Kapteni Mkuchika amesema Manji ndio Mwenyekiti wa Yanga huku Mjumbe wa Kamati ya Utendaji Thobas Langalanga aliyekuwa ameteuliwa kukaimu wadhifa huo hatambuliki

Mwenyekiti Kamati ya Uchaguzi ya TFF Malangwe Ally Mchungahela amesema wanazo taarifa kuwa kuna wajumbe wa Kamati ya Utendaji ya Yanga kwa kushirikiana na baadhi ya Wanachama wamepanga kuitisha Mkutano kesho Jumapili kutangaza kumtambua Yusufu Manji kuwa Mwenyekiti halali wa Yanga na kupinga uchaguzi wa kujaza nafasi yake.

TFF imewatahadharisha wote wanaopanga ajenda hiyo na kusisitiza kuwa mchakato wa uchaguzi kwa nafasi zote zilizotangazwa utaendelea kama ulivyopangwa.

Mchungahela amesema wote wanatakaoshiriki katika ajenda hiyo watachukuliwa hatua za kinidhamu na TFF bila ya kujali nafasi zao

Aidha, kutokana na kuchelewa kwa zoezi la utolewaji wa fomu, zoezi hilo sasa litafikia tamati Jumatano Novemba 14 baada ya TFF kuongeza siku moja

Hii leo yanga sc itacheza mchezo wa kirafiki dhidi ya African Lyon

Mchezo huo utapigwa majira ya saa 10 jioni katika uwanja wa uhuru jijin Dar es salaam

Baada ya kutua Azam Fc mshambuliaji wa zamani wa Yanga Obrey Chirwa amesema hana kinyongo na kocha wa timu hiyo Mwinyi Zahera aliyemuwekea ngumu kurejea Jangwani.

“Kocha alisema mimi simtaki Chirwa sababu ana tabia ya kugoma. Ni kweli mimi niko hivyo hivyo na siwezi kubadilika,” Chirwa aliwaambia waandishi wa habari jana baada ya kutambulishwa na Azam Fc.

“Mpira ni kazi yangu, kama silipwi stahiki zangu lazima nidai kwa njia yoyote. Na kama nikishindwa nitavunja mkataba”

“Sina tatizo na kocha wala klabu ya Yanga, ninamtakia kila la kheri aweze kuipa mafanikio Young Africans,” amesema

Katika hatua nyingine Chirwa ameeleza kushangazwa na wachezaji wengi hapa nchini kutokana na kushindwa kuwa na misimamo jambo ambalo linawafanya waendelee kuzipigania timu zao bila kulipwa chochote.

“Unajua wachezaji wengi hapa nchini wamekosa msimamo wa kulinda mikataba yao, niko tayari kuvunja mkataba wangu na kwenda mahala pengine ninapoona stahiki zangu hazilipwi kwasababu nina familia na inanitegemea” alisema.