Nahodha wa kikosi cha Simba John Bocco amesema wanatambua walikosa ufanisi kwenye mchezo wa ligi jana dhidi ya Lipuli Fc na kulazimishwa suluhu ya bila kufungana.

Bocco ameahidi kurekebisha makosa na amesema anaamini watafanya vizuri kwenye mchezo ujao wa ligi ya mabingwa dhidi ya Mbabane Swallows.

“Haikuwa matarajio yetu kwa matokeo tuliyoyapata, tulijitahidi kutengeneza mashambulizi lakini haikuwa bahati yetu. Tunaangalia kipi tulichokosea, tunaenda kujirekebisha ili tufanye vizuri kwa mchezo unaokuja,” amesema

Bocco amekuwa sehemu kubwa ya mjadala miongoni mwa mashabiki wa Simba tangu jana baada ya kukosa nafasi nyingi za wazi kwenye mchezo dhidi ya Lipuli Fc

Kikosi cha Simba kinatarajiwa kuendelea na mazoezi kesho kujiandaa na mchezo wa ligi ya mabingwa utakaopigwa kwenye uwanja wa Taifa Jumatano, Novemba 28 2018.

Mabingwa watetezi, ligi kuu ya Tanzania Bara, Simba wamelazimishwa suluhu ya bila ya kufungana na timu ya Lipuli FC kwenye mchezo uliopigwa uwanja wa Taifa Dar es Salaam.

Kocha wa Lipuli Fc Selemani Matola ameendeleza ubabe dhidi ya timun yake ya zamani Simba huo ukiwa mchezo wa tatu timu hizo zinatoka sare

Timu zote zilishambuliana kwa zamu lakini washambuliaji walikosa nafasi kadhaa za wazi kutokana na kukosa umakini langoni

Kwa matokeo hayo Simba imefikisha alama 27 ikisalia nafasi ya tatu alama mbili nyuma ya Yanga inayoshika nafasi ya pili

Mkufunzi wa klabu ya Simba Patrick Aussems, amesema kikosi chake kimejiandaa vyema na kina matumaini makubwa ya kuibuka na ushindi kwenye mchezo dhidi ya lipuli Fc utakaopigwa dimba la Taifa kesho Ijumaa.

Mchezo huo ni mwendelezo wa Ligi Kuu iliyokuwa imesimama kwa muda kupisha Kalenda ya Fifa ya mechi za kimataifa.

Kocha huyo raia wa Ubelgiji kikosi chake kwa mara ya kwanza msimu huu kitamkosa beki mahiri Shomari kapombe aliyeumia akiwa na timu ya Taifa nchini Afrika Kusini.

“Tumejiandaa vizuri, tulikuwa na muda mrefu wa kufanya maandalizi kwa wachezaji ambao hawakuwapo kwenye timu za taifa, naamini bado tutaendeleza makali yetu,” amesema

Mbelgiji huyo amesema anafahamu mashabiki wa timu yake wanataka mwendelezo wa ushindi na ndicho alichokuwa akikifanyia kazi.

“Tutaingia uwanjani kwa lengo la ushindi na nafurahi kuona wachezaji wangu wanahamasa na hata wale waliokuwapo kwenye timu ya taifa nao wanauangalia mchezo huu kwa umakini,” alisema.

Mchezo huo wa kesho awali ulikuwa ufanyike juzi lakini bodi ya ligi iliusogeza mbele ili kuwapa nafasi wachezaji wa Simba waliokuwa kwenye majukumu ya timu ya taifa kuungana nao na kupata muda kidogo wa kupumzika.

Simba ilikuwa na wachezaji 10 kwenye timu za Taifa za Tanzania, Uganda, Rwanda na Burundi

Mchezo wetu wa Ligi Kuu ya Tanzania Bara dhidi ya Lipuli ambao ulikuwa umepangwa kuchezwa kesho Jumatano 21/11/2018 umesogezwa mbele na sasa utachezwa siku ya Ijumaa 23/11/2018.

Mabadiliko hayo yamefanywa ili kuwapa nafasi wachezaji wetu waliokuwa kwenye timu zao za Taifa kujiunga na kikosi chetu ili kuwa sehemu ya wachezaji ambao watacheza mchezo huo.

Kiraka wa kimataifa na beki tegemeo wa Simba, Shomary Kapombe ameendelea na mkosi wa kuumia akiwa na timu ya Taifa ‘Taifa Stars’ baada ya kupata majeraha yakayomweka nje ya uwanja wa muda mrefu.

Kuumia kwa Shomary, kumemtibua Kocha Mkuu wa Simba na mabosi wa klabu hiyo hasa ikizingatiwa kuwa Wekundu wa Msimbazi wanakabiliwa na mechi ngumu kwa sasa, hivyo kuilazimisha Simba isake mbadala yake bila matarajio.

Kocha Aussems alisema kuumia kwa Kapombe ni pigo kwa kikosi chake na anawasiliana na viongozi kuona wanafanya nini katika dirisha dogo ili kuziba nafasi yake, ingawa anakiri mbadala wake hatamtumia mechi za CAF.

Beki huyo wa pembeni anayemudu beki ya kati na kiungo, aliumia pia mwaka jana akiwa na Stars katika michuano ya Cosafa na majeraha yake yalimweka nje ya uwanja kwa muda mrefu wakati huo akitua Msimbazi kutoka Azam FC.

Majeraha ya awali yalimfanya Kapombe alijigharamie kujitibu mwenyewe Afrika Kusini na hata sasa akiumia akiwa Lesotho kumembakisha Afrika Kusini na taarifa zinasema atakuwa nje kwa muda wa miezi miwili kutibu jeraha la kifundo cha mguu.

Hata hivyo, kwa sasa Simba imebeba jukumu la kumtibu mchezaji huyo tegemeo kwenye kikosi cha kwanza cha Mbelgiji, Patrick Aussems, ili kuhakikisha anarudi uwanjani haraka.

Jeraha hilo limewatia hofu viongozi wa Simba ambao wanajiandaa na mechi ya kwanza ya Mabingwa wa Afrika dhidi ya Mbabane Swallows ya Swaziland kati ya Novemba 27 na 29 itakayochezwa jijini Dar es Salaam.

Aussems sasa atalazimika kuwatumia wachezaji waliopo kwenye kikosi hicho ambapo nafasi ya Kapombe ndani ya Simba anayeweza kumudu kuicheza ni Erasto Nyoni kwani Nicholous Gyan hata kama anaweza ila jina lake halijapelekwa CAF kwa ajili ya michuano hiyo.

Kwenye michuano ya ligi, Aussems huenda akasajili beki mpya atakayeendana na kasi ya Kapombe ili pengo lisiwepo hata kama atalazimika kuendelea kumtumia Nyoni basi nafasi ya beki, lakini lazima asajili kama atahitaji kuongeza nguvu ingawa yupo Juuko Murshid na Pascal Wawa.

Tetesi zilizopo ni kwamba beki wa Prisons, Salum Kimenya yupo mawindoni ingawa imeleezwa kwamba hata wakimnasa beki huyo basi itakuwa ni kwa ajili ya ligi na sio michuano ya kimataifa.

Kocha mchambuzi wa soka, Dk Mshindo Msolla alifafanua hilo, “Kimenya ni mzuri lakini kwa Simba hii bado sana, hawezi kuvaa viatu vya Kapombe hata siku moja, ni mzuri kwa timu nyingine kama wanatafuta mrithi wa Kapombe kwa kipindi hiki basi waende nje ya nchi kwa hapa Tanzania hakuna zaidi ya Erasto Nyoni ambaye pia hamudu vyema.

“Kapombe atabaki kuwa Kapombe kwenye ligi hii, kocha akimtoa Nyoni kucheza pale kati basi asajili beki mwingine wa katikati na si vinginevyo,” alisema Msolla Kauli hiyo iliungwa na Joseph Kanakamfumu kwamba Kimenya si mchezaji wa kucheza Simba hii yenye kusaka mafanikio makubwa na imepiga hatua ndefu.

Mjumbe wa Bodi ya Wakurugenzi ya Simba, Salum Abdallah ‘Try Again’ alielezea hali ya Kapombe huko Afrika Kusini kwamba;

“Anaendelea vizuri na atakuwa nje kwa miezi miwili, ni pigo kwetu na sasa tunamshughulikia ili apone haraka na kurejea kwenye majukumu yake, mapendekezo yatakayoletwa na kocha kuhusu nafasi yake yatashughulikiwa haraka”.

Mwanaspoti